همي من كـــثر يذبل وراها
ونار الكلب مــا يخمد وراها
كل شده يـــهل وادم وراها
فرج ، والفرج من رب البريه
-----------------------------------
يوصفون العوارف شجر من شاف
على اطرافه يموج السيل منشاف
اكلنا التمر والغصن منشاف
ميت لا شاف شمس ولا وطيه
---------------------------------
شربت التتن وانشبلي سعالاي
مريض ومحد امن اهلي سعالاي
نخيت امن الله والعباس سعالاي
زرگ رمحه ومرگ طيبه عليه
----------------------------------
الهوى والله يذوب گلوب منصاد
وعمت عينه حبيبي بيوم منصاد
چنت صياد ماهر وابد منصاد
ولچن هسه انصدت غصبن عليه
---------------------------------
العمر راح بهواك ونقص مازاد
وحجيك بس وعد كذاب ما زاد
انا البيه زماني صاح مزاد
والف شراي يتعامل عليه
----------------------------------
ارد ابجي واذب الدمع بسطول
وعبرنة بحور ما تنعبر بسطول
جثير من الزلم يا خوي بسطول
ويصح زغير وافعاله بلية
----------------------------------
يا طارش خذ معك مكتوب وصلة
للي ما كطع وياي وصلة
وكلة الكلب جان وياك وصلة
وغدة الف من جفاك الية
-----------------------------------
انا الي ناوي اروحن ولا عود
ربابة ما تسليني ولا عود
ولا شخاط البقة بجيبي ولا عود
قوطية التتن حصرة علية
-----------------------------------
وحك طه ونبي عيسى وصالح
ابغرامك بس آنه مخلص وصالح
تظل لشوكت تتزعل وصالح
حلاة العشك من نفرح سوية
----------------------------------
وحك عينك وحك جفنك ورمشاك
اظل طول العمر امشي ورة مشاك
الي بالكَلب منك ورم شاك
اطيبن من تحط ايدك علية
----------------------------------
احباب الكلب شلون حالتكم بعدنة
شبدينة والزمن عنكم بعدنة
اذا انتو نسيتوا ترة احنة بعدنة
بذكركم كل صباح وكل مسية
----------------------------------
حرت اش اشتري كية لو بيكم
ومدري الصوج بية لو بيكم
والله لو تلعب لعب زيدان وبيكهم
ما اخليك تراوغني وتشمت الناس بية
------------------------------------
عليك الروح تجذبني واردهه
لان كلبي نبع صافي وردهه
شلون تغيب وانت اسمك وردهه
واردلك بالشعر غصبا عليه
--------------------------------
احبك من صغر عودي وسني
ومن حبك سقط شعري وسني
على حالي بچه شيعي وسني
وثالثهم مسيحي يون عليه
--------------------------------